De Dichter fan Fryslân organisearret in Fryske SLAM!

03/05/2023

Wa is de bêste Fryske foardrachtskeunstner? Kom nei de folslein Frysktalige poëzyslam! Op woansdei 24 maaie om 19:30 sil it heve yn it tydlike kafé fan Tresoar De Gouden Leeuw. Dichter fan Fryslân Sigrid Kingma iepenet, dêrnei kinne de dielnimmers los. Gabriëlle Terpstra liedt de jûn.

It is in klassike slam, wat betsjut dat it publyk kiest wa’t de bêste foardrager is troch hieltyd twa stimmen wei te jaan oan de favoriten. Der binne trije rondes: foarronde (alle 10 dielnimmers), twadde ronde (5 meie troch) en de finale (2 finalisten yn in duel). Tusken de earste en twadde ronde troch is der in bysûnder yntermezzo mei Nyk de Vries, Dichter fan Fryslân 2019-2021 dy’t nij wurk hearre litte sil. Dat ûnder it genot fan boarrelhapkes wylst de stimmen teld wurde. De finalist dy’t de measte roazen ûntfangt fan it publyk, wint de slam en in bedrach fan €500,-.

As dielnimmer opjaan foar de slam kin fia: info@dichterfanfryslan.nl oant 15 maaie of oant de ynskriuwing fol is. Alle dielnimmers wurde yn de oanrin nei de slam yntrodusearre yn podcasts. Hâld rekken mei twa foardrachten fan elk maksimaal 3 minuten, en in repetoire foar de finale: yn 7 minuten bringe twa finalisten om bar in fers. Alles yn it Frysk fansels.

Nim dyn fans, famylje en freonen mei. Tagong is fergees en oanmelde is net nedich. Wy tidigje op ferpletterjende foardrachten en poëtyske hichtepunten. Oant dan!

De Fryske SLAM! wurdt organisearre yn gearwurkinge mei Explore the North. Leeuwarden UNESCO City of Literature en Tresoar.

Syds Wiersma wint de Fryske SLAM!

25/05/2023

Dichter, skriuwer Syds Wiersma krige justerjûn yn kafee De Gouden Leeuw yn Tresoar de measte publyksstimmen yn de finale fan de Fryske SLAM! Dêrmei waard hy de bêste Poëzijslammer fan Fryslân. Jens de Vries waard twadde.

Nij gedicht Dichter fan Fryslân

03/05/2023

‘Spjalt’ is it nijste gedicht fan Sigrid Kingma as Dichter fan Fryslân. Hjoed ek te lêzen yn it Friesch Dagblad, de Leeuwarder Courant en op de webside fan Omrop Fryslân.