Diskear, op Gedichtedei, in gedicht dat de ôftraap foarmet fan it projekt ‘Wjerspegelje’ wêrby’t koarte gedichten plakt wurde op spegels yn de hoareka fan Ljouwert. Koarte literêre teksten fan 20 sekonden dy’tst lêze kinst tidens it waskjen fan dyn hannen. It projekt ‘Wjerspegelje’ is in gearwurking tusken Merk Fryslân, Ljouwert City of Literature en ferskate dichters.
Arjan Hut sil ek yn 2026 Dichter fan Fryslân wêze. Dêr hawwe Provinsjale Steaten fan Fryslân earder dit jier mei ynstimd. Dêrmei kin Arjan Hut, dy’t yn 2023 offisjeel ta Dichter fan Fryslân beneamd is, syn wurk en projekten as poëtysk ambassadeur in jier langer fuortsette. Sa iepenet er yn novimber op it literatuerfestival Meet Me at the Lighthouse in troch him gearstalde kuiereksposysje mei bysûndere omslaggen fan Fryske dichtbondels.
‘Net op ús’ is it nijste gedicht fan Arjan Hut as Dichter fan Fryslân. Hjoed ek te lêzen yn it Friesch Dagblad, de Leeuwarder Courant en op de webside fan Omrop Fryslân.