Poëzy wurdt fierd mei Dichter fan Fryslân

24/11/2017

Hjoed wie de feestlike beneaming fan Eeltsje Hettinga as earste Dichter fan Fryslân yn de Herman Gortertsjerke te Balk. Deputearre Sietske Poepjes toande har tige wiis mei de earste Dichter fan Fryslân: “Ik bin bliid dat in renomearre dichter as Eeltsje Hettinga him mei sa folle enerzjy en wille ynsette wol foar dit eare-amt. Mei in soad nocht sjoch ik út nei al it moais dat Eeltsje Hettinga ús bringe sil.” De deputearre dekorearre Eeltsje Hettinga mei in spesjaal ûntwurpen spjelde.

Ut namme fan de sjuery priizge Tamara Schoppert de fertsjinsten fan Eeltsje Hettinga yn de Fryske literatuer. De sjuery is entûsjast oer de fernijende plannen dy’t hy as Dichter fan Fryslân útfiere wol.

“Nei bûten ta, alle doarren iepen”, dat is wat Hettinga foar eagen stiet. Hy sil de dialooch oangean mei skriuwers en dichters út oare kultueren en taalgebieten. Poëzy wol hy keppelje  oan oare keunstdissiplines.

Eeltsje Hettinga is tige wiis mei de beneaming: “Moai ferrast en knap optein. Dichter fan Fryslân, de sjuery hat kediisd en beslist, net allinnich oer it gedicht ‘Under de steden’, mar likegoed ek oer de plannen dy’t ik foar de ynfolling fan dat dichterskip yntsjinne haw. Dêr draai en slinger oan te jaan, dat is de útdaging, de keunst. Foarop stiet it plezier, it plezier fan it meitsjen, it plezier fan de tekst, it plezier fan de wurden. Yn it meitsjen bin ik myn wurden. Leve de poëzy, leve de taal, leve it Frysk ek.”

Sneon 25 novimber is it earste optreden fan de Dichter fan Fryslân. Eeltsje Hettinga treedt op ûnder Explore the North yn de Westertsjerke te Ljouwert (18:30 oere).

De Dichter fan Fryslân skriuwt it Grut Frysk Diktee

03/02/2020

Nei it sukses fan it Grut Frysk Diktee fan 2018, op it Aldehoustertsjerkhôf, mei mear as 600 dielnimmers, wurdt der dit jier op tiisdeitejûn 21 april wer in ‘gewoan’ Grut Frysk Diktee hâlden yn de Steateseal fan it Provinsjehûs yn Ljouwert. It diktee wurdt diskear skreaun troch de Dichter fan Fryslân, Nyk de Vries.

Nasjonale Gedichtedei

30/01/2020

Hjoed giet de poëzijwike los mei de Nasjonale Gedichtedei. Nyk de Vries, Dichter fan Fryslân, skreau spesjaal foar dizze dei it gedicht ‘Unwis’.